Во Основниот кривичен суд Скопје денеска започнува судскиот процес против Стојанче Јовановски, обвинет за серија кривични дела кои претходеа на трагичниот настан од 2 март, кога неговата сопруга Ивана и нивната 6-годишна ќерка си ги одзедоа животите.
Обвинителството го гони Јовановски за три тешки кривични дела:
- Наведување на самоубиство и помагање во самоубиство (член 128 од КЗ).
- Загрозување на сигурноста при семејно насилство.
- Телесна повреда како продолжено дело на насилство.
Судењето ќе го води судијата Ивица Стефановски, кој веќе е познат на јавноста по водењето на случајот за убиствата на Вања Ѓорчевска и Панче Жежовски.
Според истрагата, жртвата била подложена на континуирано физичко и психичко малтретирање уште од 2019 година. Иако насилството било пријавувано од сведоци и од самата жртва, истото се интензивирало во текот на 2025 и 2026 година, за време на нивната бракоразводна постапка.
Обвинителството тврди дека суровото и нечовечно постапување на Јовановски, вклучувајќи понижувања и закани за одземање на детето, ја турнало жената во состојба на тешка психичка вознемиреност која резултираше со двојна трагедија.