Пратеникот Миле Цеков во емисијата Ноќно студио на 4ТВ изјави дека одлуката да се повлече од партијата ЗНАМ и да дејствува како независен пратеник е резултат на подолг процес и несогласувања околу клучни политики.
„Одлуката не беше донесена врз основа на еден настан, туку е производ на повеќе состојби кои покажаа дека партијата суштински се разликува од она што го ветувавме пред изборите и она што се случува по две години власт“, рече Цеков.
Тој посочи дека не добил поддршка од партиските колеги за неколку негови иницијативи, меѓу кои зголемување на минималната плата и обезбедување достоинствени приходи за работниците, како и антикризни мерки за земјоделците.
Дополнително, Цеков истакна дека останува на својот став против предложените измени во законот за минерални суровини, потенцирајќи дека бил против ова решение и пред изборите.
Како една од причините за несогласување ја наведе и нетранспарентноста во јавните финансии. Тој побарал да се објават компаниите кои добиле средства од т.н. унгарски кредит, но, како што рече, на тоа прашање немало одговор.
Цеков информираше дека предложил и законско решение за зголемување на прагот за оданочување од 2 на 4 милиони денари, со цел поддршка на малите компании и земјоделците, но предлогот не влегол во собраниска процедура.
„Нашата клучна порака во кампањата беше правна држава и борба против криминалот и корупцијата, но реалноста денес покажува поинаква слика“, истакна тој, посочувајќи го случајот со Артан Груби како пример за, како што рече, разочарувачки исходи.
И покрај тоа, Цеков нагласи дека неговата одлука не треба да биде во фокусот на јавноста.
„Најважно е што граѓаните се соочуваат со реални проблеми на кои треба што поскоро да се посветиме. Тоа е многу поважно од мојата одлука“, додаде тој.