Манасиевски: Дојде крајот на шерифувањето на Ислам Абази – нема правда додека судството ги штити криминалците на СДСМ и ДУИ
РРедакција|
Државата не може да има независен правосуден систем сè додека клучните обвинителски и судски инстанции работат во директна координација со СДСМ и ДУИ за спас на партиските кадри. Ова во емисијата „Ноќно студио“ на „4ТВ“ го порача портпаролот на ВМРО-ДПМНЕ, Валентин Манасиевски, кој директно го прозва шефот на Обвинителството за гонење организиран криминал и корупција (ОЈО ГОКК), Ислам Абази.
Според Манасиевски, деновите на досегашниот начин на функционирање на ова обвинителство се одбројани.
„Дојде крајот на обвинителот Ислам Абази. Тој сега пробува на било кој начин да ги спаси оние за кои јавноста, преку истражувачките новинари и медиумите, јасно виде дека направиле криминал. Сите видоа дека има криминал и труење на народот, и дека постојат докази за истото, само Абази и неговите соработници не видоа ништо“, изјави Манасиевски.
Како илустрација за селективноста и заштитата на криминалот, портпаролот на владејачката партија го посочи случајот во кој се олеснета одговорноста за сума од безмалку 167 милиони евра. Тој направи остар контраст со банални случаи од минатото за кои се изрекувале строги затворски казни.
Апсурдот во судството: „Имавме случај каде за украдени 150 ќебапчиња се добиваше казна од 4 години затвор. А сега, од друга страна, имаме случај тежок 167 милиони евра со 13 осомничени лица, за кои истото ова обвинителство минатата година бараше притвор за да не избегаат, а само една година подоцна тврди дека тие немаат никаква врска со случајот“, алармираше Манасиевски.
Соседските врски со Зајас: Тој не пропушти да ја потсети јавноста и на политичко-географската поврзаност на првиот човек на организираниот криминал со раководството на ДУИ, нагласувајќи: „Патем, да не заборавиме дека Ислам Абази е прв комшија на Али Ахмети во Зајас“.
Манасиевски заклучи дека вистинското прочистување на државата и воспоставувањето на правната држава ќе започне тогаш кога правосудните органи ќе се ослободат од стегите на поранешната власт.
„Кога ќе заврши ова обвинителство и судство кое е во директна координација со СДСМ и коешто ги штити криминалците, дури тогаш ќе имаме вистинска правда во Македонија. А верувајте, на тоа навистина ќе му дојде крајот и тој процес ќе биде завршен“, дециден е портпаролот на ВМРО-ДПМНЕ, Валентин Манасиевски.
