Со пораки за еднаквост, прифаќање и видливост, денес од фонтаната „Лотос“ во Градскиот парк започна осмата Парада на гордоста во Скопје, која годинава се одржува под слоганот „Сите нека знаат“.
Учесниците носеа знамиња и симболи во боите на виножитото, а организаторите истакнаа дека слоганот ја нагласува потребата од поголема видливост на ЛГБТИ+ заедницата и упатува на предизвиците и недостатоците во системот со кои таа сè уште се соочува.
Според организаторите, годинашниот марш има изразен протестен карактер и претставува одговор на зголемениот притисок и обидите за институционално невидливеење на ЛГБТИ+ заедницата.
Поворката се движи по проширена маршрута низ централното градско подрачје: започна по булеварот „Илинден“, продолжува по улицата „Рузвелтова“, булеварот „Партизански одреди“, булеварот ВМРО и улицата „Димитрие Чуповски“, а ќе заврши во паркот „Жена-борец“, спроти Собранието.
За разлика од претходните години, организаторите одлучија маршот да мине без музичка програма и забавен дел на крајната локација, со цел фокусот целосно да биде ставен на протестните пораки и барањата.
Меѓу клучните барања се донесување на Законот за матична евиденција, правно признавање на родот, посилна заштита од насилство и поодлучна борба против говорот на омраза.
По завршувањето на маршот, заедницата ќе ја одбележи Парадата на гордоста со вечерен настан во културниот центар „Лабораториум“.