Иран соопшти дека во петокот извршил нови напади врз американски објекти на Блискиот Исток, вклучително и прв директен напад врз цели во Сирија, по шестата последователна ноќ на американски напади врз ирански воени објекти.
Примирјето постигнато минатиот месец прерасна во секојдневни напади и контранапади, што речиси целосно го запре поморскиот сообраќај низ стратешки важниот Ормуски Теснец и ја зголеми загриженоста кај инвеститорите поради последиците од конфликтот врз глобалната економија.
Американската војска соопшти дека завршила уште една ноќ на напади врз Иран, со цел дополнително да ги ослаби иранските воени способности. Меѓу целите биле објекти на островот Кешм и во близина на Бандар Абас, каде се наоѓа најголемото иранско пристаниште, како и важни капацитети на морнарицата и Револуционерната гарда.
„Американските сили, вклучително борбени авиони, беспилотни летала и воени бродови, употребија прецизно оружје со кое беа погодени десетици ирански воени цели, како крајбрежни системи за надзор, позиции за противвоздушна одбрана, воена логистика и поморски капацитети“, се наведува во соопштението на американската Централна команда.
Иран тврди дека првпат ја нападнал Сирија
Иранската полуслужбена агенција „Тасним“ објави дека едно цивилно лице загинало во американски напад врз областа Пасабандар, во близина на југоисточниот пристанишен град Чабахар.
Иран возвратил со ракетни напади и беспилотни летала врз американски воени бази во соседните земји, меѓу кои и воздушна база во Јордан.
Во петокот наутро иранската армија соопшти дека нападнала американски објекти во Бахреин и Кувајт. Во катарскиот главен град Доха, според сведоци, се слушнале неколку експлозии, а Министерството за внатрешни работи соопштило дека едно дете било повредено од остатоци.
Иранските медиуми објавија дека во последниот бран американски напади биле погодени пет мостови, железничка станица во крајбрежниот град Бандар Хамир и аеродромот во Ираншахер.
Според државната агенција ИРНА, во американските напади врз мостови во Бандар Хамир загинале седум лица.
Иранските државни медиуми објавија и дека Револуционерната гарда го нападнала американскиот команден центар за специјални операции во Ал Танф, во Сирија, како одмазда за убиството на ирански војници во Ираншахер. Овие информации засега не се независно потврдени.
Ова би бил прв директен напад на Иран врз Сирија, која досега се обидуваше да избегне директно вклучување во конфликтот што ги зафати соседните држави.
Речиси целосно запрен сообраќајот низ Ормускиот Теснец
Новото заострување на конфликтот повторно го запре поморскиот сообраќај низ Ормускиот Теснец – еден од најважните светски патишта за транспорт на нафта и гас.
Поради кризата, цените на нафтата повторно пораснаа, а се појавија нови стравувања за влијанието врз инфлацијата и глобалната економија.
Техеран ја обнови блокадата на теснецот, додека Вашингтон од средата повторно воведе блокада на иранските пристаништа.
Извори за „Ројтерс“ изјавиле дека Иран би можел да ги поттикне своите сојузници Хутите во Јемен да затворат уште една важна поморска рута – Баб ел Мандеб, на влезот во Црвеното Море, доколку САД продолжат со нападите врз иранската инфраструктура.
Иран минатата недела нападна бродови кои пловеле низ безбедносниот коридор во Ормускиот Теснец. Од Белата куќа порачаа дека претседателот Доналд Трамп нема да дозволи вакви активности без последици, но истовремено нагласија дека вратата за дипломатија останува отворена.
Иранските извори наведуваат дека целта на Техеран е да воспостави контрола над теснецот, но дека не сака дополнителна ескалација која би го загрозила договорот за разбирање постигнат во јуни.