Министерот за внатрешни работи Панче Тошковски порача дека Владата и надлежните институции се целосно посветени на справување со кризата во Гостивар, нагласувајќи дека во моментов приоритет е што побрзо да се пронајде решение за проблемот со загадената вода.
Тој истакна дека лично е на терен заедно со жителите на Гостивар и со стручните служби, наместо времето да го поминува со своето семејство.
„Јас не сум дома со семејството, туку сум овде со гостиварчани и бараме решение како што побрзо да го отклониме проблемот“, изјави Тошковски.
Министерот оцени дека состојбата е резултат на, како што рече, несовесно работење на лица кои на локално ниво имале обврска навремено да си ја извршуваат работата.
„Овој проблем е настанат поради несовесно работење на одредени лица кои требало да си ја работат работата, а за жал не ја работеле“, рече Тошковски.
Тој повтори дека државните институции ќе продолжат со сите неопходни мерки за надминување на кризата и дека граѓаните ќе бидат навремено информирани за секој следен чекор, со цел што поскоро да се нормализира состојбата со водоснабдувањето во Гостивар.