Поранешниот сириски претседател Башар Асад е осуден на смрт во отсуство за злосторства против човештвото и воени злосторства, соопшти Скај њуз, повикувајќи се на одлука на сириски суд.
Асад избега од Дамаск и одлета за Москва во декември 2024 година, откако неговата власт падна по молскавична офанзива на антивладините сили.
Неговиот братучед по мајчина линија, Атеф Наџиб, кој е уапсен во Сирија, исто така беше осуден на смрт за раководење со репресиите во 2011 година во јужната провинција Дараа, каде малолетници беа приведувани и мачени поради графити против режимот. Настаните во Дараа поттикнаа масовно востание против власта на Асад, а потоа и граѓанска војна што траеше до падот на неговата влада.
Од 2011 година, владеењето на Асад беше проследено со широки обвинувања за ѕверства, меѓу кои и употреба на хемиско оружје како зарин, хлор и иприт. Во 2013 година, гасен напад врз бунтовничката Источна Гута, близу Дамаск, уби десетици цивили. Имаше и бројни извештаи за силувања, обезглавувања и тортура.
По 24 години на власт и 13 години граѓанска војна, режимот во Сирија падна кон крајот на 2024 година. Бунтовниците, кои ја презедоа престолнината, преку државната телевизија објавија: „Во името на Семоќниот и Милостивиот, градот Дамаск е ослободен. Тиранинот Башар ал Асад е симнат. Сите неправедно затворени се ослободени од затворите на режимот. Да живее слободна и независна Сирија.“ Во соопштението беше наведено и ослободувањето на политичките затвореници.
Големиот затвор северно од Дамаск беше ставен под контрола на бунтовниците. Комплексот Седнаја се сметаше за еден од симболите на репресиите на Асад; според проценките на Амнести интернешенал, само таму режимот егзекутирал меѓу 5 и 13 илјади лица. Низ целата земја војници и полицајци дезертираа и ги напуштија своите позиции.
Подоцна, веќе поранешниот сириски лидер во првото обраќање по падот на режимот изјави дека не планирал да ја напушти земјата, но дека руската војска го евакуирала. Лидерите на сириските бунтовници порачаа дека ставиле крај на своето џихадистичко минато. Во интервју за Би-Би-Си, фактичкиот лидер на Сирија Ахмед ал Шараа увери дека земјата повеќе не претставува закана за светот: „Кога се вратив во Сирија, почнавме да работиме исклучиво во рамки на земјата и ги прекинавме сите врски со надворешни организации — без разлика дали станува збор за Ал Каеда или за некоја друга. Сега работиме за заштита на интересите на Сирија на најдобар можен начин и на тоа гледаме како на дел од минатото. Сирија е изнемоштена од војни; сега мора да ја зајакнеме и развиеме. Како што сум кажал многупати, денес Сирија не претставува никаква опасност или закана за ниту една држава во светот.“
За привремен претседател беше назначен токму Ахмед ал Шараа, по што беа одржани и првите избори по повеќе од четири децении авторитарна власт на семејството Асад и деценија на граѓанска војна.