Магнетите што ги поставуваме на фрижидерот сами по себе не ја зголемуваат потрошувачката на електрична енергија, но одредени предмети поставени на вратата можат да предизвикаат проблем со нејзиното затворање и индиректно да ја зголемат сметката за струја.
Обичните декоративни магнети се премногу слаби за да влијаат врз работата на компресорот или да го ослабнат гумениот заптив. Потрошувачката на фрижидерот главно зависи од изолацијата, размената на топлина, температурата и тоа колку често се отвора вратата.
Проблем може да настане доколку на работ од вратата се поставени дебели магнети, метални стеги, гломазни сувенири или магнетни табли. Тие можат да спречат вратата целосно да се затвори, со што топол воздух навлегува во фрижидерот, а влажноста се зголемува.
Во таква ситуација, компресорот мора да работи подолго за повторно да ја постигне зададената температура. Тоа може да доведе и до прекумерно создавање мраз во замрзнувачот.
Дополнителен фактор е честото отворање на вратата. Доколку фрижидерот се користи како место за закачување белешки, менија или распореди, почестото отворање овозможува влегување топол воздух и може да ја зголеми потрошувачката на енергија.
Кај современите фрижидери, компресорот се активира и исклучува според температурата што ја регистрираат сензорите и термостатот. Затоа, проблемот не е во магнетното поле на декоративниот магнет, туку најчесто во тоа дали вратата добро дихтува и колку долго останува отворена.
Постои едноставен начин да проверите дали заптивката добро ја затвора вратата. Ставете лист хартија А4 меѓу гумената заптивка и рамката, затворете ја вратата и обидете се да го извлечете листот. Ако хартијата лесно се извлекува на одредено место, можно е таму да нема доволно добро запечатување.
Знаци дека фрижидерот губи студ може да бидат појава на кондензација, прекумерно создавање мраз во замрзнувачот, подолга работа на компресорот или врата која не се затвора целосно.
Во вакви случаи, отстранувањето на гломазните предмети од работ на вратата или правилното наместување на заптивката може да помогне фрижидерот повторно да работи поефикасно.