Астрономите за првпат директно детектирале радиосигнал од планета надвор од Сончевиот систем. Сепак, сигналот не е доказ за вонземски живот, туку укажува на постоење исклучително силно магнетно поле.
Сигналот доаѓа од егзопланетата Бета Пикторис б, која се наоѓа на околу 63 светлосни години од Земјата. Станува збор за гасовит џин околу 12 пати помасивен од Јупитер.
„Знам дека радиосигналите се поврзуваат со потрагата по вонземски разум. Но, овде станува збор за нешто сосема различно“, изјави Едо Бергер, професор по астрономија на Универзитетот „Харвард“.
Според научниците, радиосигналот е поврзан со силното магнетно поле на планетата и со поларните светлини, слични на Северната светлина на Земјата.
Бергер наведува дека магнетното поле на Бета Пикторис б е најмалку 200 пати посилно од магнетното поле на Јупитер. Магнетните полиња се важни бидејќи можат да дадат информации за структурата и атмосферата на планетите надвор од нашиот Сончев систем.
За откривање на сигналот научниците го користеле МеерКААТ, систем од 64 радиотелескопи во Јужна Африка. Истражувачите велат дека сигналот бил регистриран повеќепати и на различни фреквенции, а неговиот извор бил лоциран директно на планетата, а не на ѕвездата околу која таа орбитира.
Откритието е особено значајно бидејќи претходните наводни сигнали од егзопланети не биле потврдени поради можноста да потекнуваат од нивните матични ѕвезди.
Сепак, истражувањето сè уште не е научно рецензирано. Доколку резултатите бидат потврдени, научниците очекуваат тие да дадат нови сознанија за магнетните полиња и атмосферата на егзопланетите.