Нови масовни протести се одржуваат денеска низ Франција, каде што младите и припадниците на движењето „Жолти елеци“ бараат повисоки плати, повеќе средства за образование и поголема заштита на децата и адолесцентите.
Францускиот министер за внатрешни работи, Лоран Нуњез, соопшти дека низ земјата се очекуваат меѓу 50 и 60 протестни собири, поради што се мобилизирани околу 70.000 полицајци и жандарми.
Во Париз демонстрациите против високите трошоци за живот започнаа на Плоштадот Република, а поради движењето на демонстрантите затворена е 21 метро-станица.
На протестите во француската престолнина се очекува да се приклучат и активисти за заштита на животната средина и организации кои се борат против насилството врз децата и младите. Проценките се дека на улиците на Париз ќе излезат меѓу 30.000 и 60.000 демонстранти.
Протестни собири се најавени и во Бордо, Рен, Лион и Марсеј.
Во Тулуз мирно заврши протестот организиран од левичарските партии и синдикатите, на кој, според полициските проценки, присуствувале 1.800 лица, додека организаторите соопштија дека имало околу 6.000 учесници.
Денешните демонстрации се продолжение на бранот протести што започна на 24 октомври.