Новиот Обвинител за гонење на организиран криминал и корупција Ислам Абази денеска даде дообјаснување околу фотографиите кои излегоа во јавноста, а на кои може да се забележи дека е во друштво на високи функционери од ДУИ, објави СДК.мк.
Како што пишува порталот, Абази со Невзат Бејта од ДУИ случајно се сретнал на планински врв.
„Јас во период на викенди и одмори излегувам и планинарам. Хоби ми се ловот и планинарењето. Во тие делови се среќавам со луѓе и се поздравувам. Искачувањето на еден врв е радосен момент, и се практикуваат слики од формално-правен аспект. Со Бејта таму сме се нашле случајно. Мојата мајка потекнува од Гостивар и се знае со господинот Бејта. Тие имаат познанство. Така што, се сретнавме на врвот, и ништо повеќе од тоа“, кажа Абази.
За фотографија пак со братот на Ахмети вели дека била свадбарска.
„По однос на другите фотографии, јас и моите родители потекнуваме од Зајас. Тоа е село како што знаете и се случува јас и моите родители да бидеме поканети со многу луѓе на иста свадба или настан. На таа фотографија со братот на Ахмети, сме повикани на свадба. Сме се сретнале таму, и тоа е. На тие свадби ние никогаш не сме зборувале ни за предмети, ниту пак за политика“, додаде тој.