Проблемот со стадото крави кои со години слободно лутаат низ Крива Паланка и околните села ескалира во отворена пресметка меѓу институциите. Откако вчера револтираните граѓани излегоа на протест поддржани од градоначалникот Сашо Митовски, денеска стигна остра реакција од Агенцијата за храна и ветеринарство (АХВ), која ја префрла топката во дворот на Општината.
„Општината одбива да соработува“
Од АХВ тврдат дека локалната самоуправа е подеднакво одговорна за состојбата со која жителите се соочуваат цели 15 години. Тие го обвинија градоначалникот Митовски за несоработка и го повикаа да почне да ги почитува законските обврски за заедничко дејствување со цел заштита на имотите на граѓаните во селата Трново, Добровница, Узем, Кркља, Варовиште, Дрење и Станци.
„Говедата ниту се размножија во толку голем број за година и половина, ниту може инстантно да се соберат, во услови кога со Агенцијата не соработува Општината која е подеднакво одговорна за решавање на проблемот“, се вели во реакцијата на АХВ.
Агенцијата најави дека и во наредниот период ќе продолжи со активности за собирање на животните во интерес на граѓаните на Општина Крива Паланка.
Државата е сопственик на кравите само на хартија
Апсурдот на ситуацијата неодамна го откри истражувањето на БИРН (од декември минатата година).
- Истражувањето покажа дека државата формално ги одзела животните од сточарот Гоце Ѓорѓиевски и неговите три ќерки уште пред една и пол година, согласно измените на Законот за благосостојба на животните.
- Сепак, АХВ е сопственик на добитокот само во документацијата.
- На терен, ситуацијата е целосно непроменета – кравите и понатаму лутаат без никаков надзор низ планинските предели, предизвикувајќи штети, а честопати преминувајќи ја и државната граница.
