Производите не смеат да се рекламираат со тврдења дека лекуваат или спречуваат болести бидејќи тоа создава лажна сигурност и ја доведува јавноста во заблуда, порача Жанета Мијоска, раководителка на сектор во Агенцијата за храна и ветеринарство (АХВ).
Сѐ почесто сме сведоци на рекламирање на производи за слабеење со тврдења кои не се научно потврдени и кои можат да бидат сериозна закана за здравјето, предупредуваат од Агенцијата. Неконтролирана употреба на чаеви и додатоци за слабеење, особено оние што се купуваат преку социјалните мрежи и нерегистрирани онлајн-продавници, може да предизвика последици како дехидратација, нарушен електролитен баланс и оштетување на органи.
– Консултирајте се со лекар, внимателно читајте ги декларациите и избегнувајте „брзи решенија“ кои можат да имаат долгорочни последици врз здравјето – апелира Радмила Ј. Николовска, државна советничка во АХВ.
Овие предупредувања беа изнесени на работилницата „Придобивки за здравје, мода или заблуда при купување на храна – нутритивни означувања, додатоци во исхрана и здравствени тврдења“, која се одржа во Скопје.
На работилницата беше истакнато дека здравствените и нутритивните тврдења што се наведуваат на прехранбените производи мора да бидат научно докажани и однапред одобрени.
– Наш приоритет е граѓаните да добиваат точни и проверени информации преку јасно декларирање на производите. Само така можат да направат информиран избор при купување храна – нагласи Мијоска.
Од АХВ апелираат граѓаните да бидат внимателни при изборот на храна и додатоци во исхрана и да купуваат само од проверени и регистрирани продавници. Инспекциските служби, како што информираат, продолжуваат со редовни контроли за заштита на јавното здравје.