Две лица се лишени од слобода откако полицијата при акциска контрола во угостителски објект во Градскиот трговски центар во Тетово пронашла бела прашкаста материја. Во акцијата учествувале полициски службеници, како и претставници на Државниот пазарен инспекторат и Управата за јавни приходи.
Според информациите од полицијата, контролата била спроведена на 23 октомври од страна на Отсекот за криминалистичка полиција при СВР Тетово и мобилниот тим „Таск форс“.
Пред угостителскиот објект бил затекнат 48-годишниот М.Р. од Тетово. При извршениот преглед кај него била пронајдена бела прашкаста материја, по што бил лишен од слобода.
Во внатрешноста на објектот, пак, кај сопственикот, 54-годишниот Ј.Т. од тетовското село Требош, биле пронајдени 15 пакувања со бела прашкаста материја. И тој бил лишен од слобода.
Двете лица биле задржани во полициска станица. Од полицијата информираат дека по целосното документирање на случајот против нив ќе следуваат соодветни пријави.