„Тешко се дише, се чувствува гребење во грлото и солзење на очите“. Ова е секојдневието на скопјани додека енормното загадување на воздухот го стега главниот град. Последиците веќе се чувствуваат во здравствените установи, кои се преполни со пациенти, особено со најмладите.
Болниците се полнат, а состојбата е најкритична кај хронично болните, лицата со астма и белодробни заболувања. Во Институтот за белодробни заболувања кај децата – Козле, бројките се загрижувачки: дневно се вршат околу 150 прегледи, а моментално хоспитализирани се околу 60 деца.
Доктор Поповска од Институтот предупредува дека загадениот воздух најмногу влијае токму врз оваа категорија, бидејќи децата имаат специфичен развојен процес на белите дробови, а нивниот имунитет е сè уште кревок.
„Децата се училишни, предучилишни, одат во градинки и училишта, имаат свои активности и неопходно е да излезат. Ако можат да носат маски, би било добро, но децата тешко ги поднесуваат. Единствено што можам да препорачам е родителите да ги заштитат така што нема да ги изнесуваат надвор кога аерозагадувањето е со високи концентрации“, советува д-р Поповска.
Лекарите апелираат училиштата и градинките да набават прочистувачи на воздух за децата барем во затворените простории да дишат квалитетен воздух.
Дополнително, д-р Поповска упати важен апел до родителите:
„Да не се носат болни деца во градинките, затоа што вирусните инфекции веќе земаат замав и ги имаме во голем број.“
И додека скопјани се гушат во смог и магла, сликата на само неколку километри над градот е сосема поинаква. На Милениумскиот крст на Водно денеска грее сонце, а воздухот е чист. Илјадници граѓани го искористија денот да побегнат од градот и барем на неколку часа да ги наполнат белите дробови со кислород, далеку од „гасна комора“ во долината.
