Долгите редици пред институциите наскоро треба да станат минато. Граѓаните отсега ќе можат да извадат клучни документи, како што се М1 и М2 обрасците, за само неколку секунди преку специјализирани „банкомати“ (дигитални киосци) кои ќе бидат поставени на најфреквентните локации низ градовите.
Оваа новина е дел од Националната стратегија за дигитална трансформација, чија цел е инфраструктурно поврзување, унапредување на дигиталните вештини и обезбедување еднаков пристап до електронските услуги за сите.
Мицкоски: Дигитализацијата е оружје против корупцијата
Премиерот Христијан Мицкоски истакна дека освен заштеда на време, дигитализацијата има клучна улога во зголемувањето на довербата во институциите.
„Дигитализацијата е еден од најефикасните начини за борба против корупцијата. Со електронските услуги се обезбедува поголема транспарентност и се намалува човечкиот фактор во процедурите“, потенцира Мицкоски.
Што е потребно за успех?
Професорот Иван Чорбев предупредува дека самото поставување на уреди не е доволно. За вистинска трансформација, потребна е системска поддршка.
„Потребни се соодветна законска регулатива, квалитетни човечки ресурси и обучена јавна администрација за да може дигиталната трансформација да функционира непречено“, смета професорот Чорбев.
Скок од 22 места според Светска банка
Напредокот на државата на ова поле е веќе забележлив. Според најновите извештаи на Светска банка, Северна Македонија направила скок од цели 22 места на планот на дигитализацијата.
Како земја кандидат за членство во ЕУ, Македонија ја прифаќа и „Европската дигитална декада“, насочувајќи се кон развој на дигиталната економија како еден од сторите на идниот развој.