Возачите од утре ќе плаќаат помалку за бензин, но повеќе за дизел. Регулаторната комисија за енергетика (РКЕ) донесе одлука со која цените на Еуросупер БС-95 и Еуросупер БС-98 се намалуваат за 2,5 денари за литар, додека дизелот и екстра лесното масло за домаќинство поскапуваат за два денари.
Новите максимални цени ќе важат од 20 октомври 2026 година, од 00:01 часот. Со одлуката, просечното зголемување на малопродажните цени на нафтените деривати изнесува 0,49 проценти во споредба со претходната одлука од 13 октомври.
Според утврдените цени, Еуросупер БС-95 ќе се продава за 96 денари за литар, а Еуросупер БС-98 за 98 денари. Дизелот ќе поскапи на 99 денари за литар, додека екстра лесното масло за домаќинство ќе чини 110,50 денари за литар.
Поскапување има и кај мазутот. Неговата малопродажна цена се зголемува за 1,837 денари за килограм и ќе изнесува 53,579 денари.
Од РКЕ информираат дека референтните цени на светскиот пазар бележат различни движења. Цените на бензините се намалени во просек за 4,142 проценти, додека кај дизелот е регистрирано зголемување од 2,966 проценти. Екстра лесното масло поскапело за 2,465 проценти, а мазутот за 4,416 проценти.
Врз пресметката влијаело и движењето на курсот на доларот во однос на денарот, кој во споредба со претходната пресметка е повисок за 0,1648 проценти.
При утврдувањето на цените, РКЕ ги применила владините мерки за намалено ДДВ од 10 проценти за дизелот, како и намалената акциза од четири денари за литар за бензините Еуросупер БС-95 и БС-98 и за дизелот.