По Кичево и Струмица, од денеска итните мерки против аерозагадувањето стапуваат на сила и во Скопје. Мерните инструменти покажаа дека горната граница на загаденост е надмината во повеќе скопски општини, но и во други градови низ Македонија, а маглата дополнително ја влошува ситуацијата.
Министерството за животна средина ги активираше протоколите за заштита на здравјето на граѓаните, со посебен фокус на ранливите категории.
Ослободување од работа и медицински препораки
Главната мерка на Владата е насочена кон работодавците. Тие се задолжени да ги ослободат од работни обврски:
- Бремените жени;
- Лицата постари од 60 години;
- Лицата со хронична астма и прележан миокарден инфаркт или мозочен удар (без разлика на возраста).
Лекарите пулмолози упатија апел до сите граѓани – ако немаат итна потреба, да не излегуваат надвор.
„Конкретно станува збор за периодот рано наутро или доцна навечер кога концентрациите се највисоки. Но, ако мора да излегуваат, нека користат јавен превоз“, советуваат лекарите.
Градски мерки: Зачестено миење улици и стоп за градежните машини
Градските власти на Скопје исто така воведоа сет мерки. „Комунална хигиена“ доби налог за зачестено миење на улиците, а инспекциите ќе ја проверуваат исправноста на уредите за загревање во домаќинствата и правните субјекти. Дополнително, се воведува ограничување за градежната механизација – таа не смее да се движи низ градот за време на сообраќајниот шпиц.
Во однос на долгорочното решавање на проблемот, од Град Скопје посочуваат дека загадувањето е децениски проблем кој не може да се реши преку ноќ, но очекуваат овој сет мерки да даде резултати.
Реакции и барања
Додека граѓаните реагираат дека тешко дишат, граѓанската иницијатива „Зелен хуман град“ бара трајно, системско решение, а не само привремени мерки кога ќе се вклучи алармот.
Министерството за животна средина наложи и итно засилување на вонредните инспекциски надзори врз индустриските капацитети за да се спречи дополнително загадување.
