Три затвореници се обвинети за убиството на осудениот убиец на дете, Кајл Беван (33), кој пред два дена беше пронајден мртов во својата ќелија во затворот HMP Вејкфилд. Беван служеше доживотна казна затвор поради бруталното убиство на двегодишната Лола Џејмс, ќерка на неговата партнерка, која почина во 2020 година од последиците на страшните повреди, пишува Sky News.
На судењето пред Кралскиот суд во Свонси било откриено дека малечката Лола имала дури 101 посебна повреда на телото, вклучително и „катастрофална“ повреда на мозокот. Лекарите ја споредиле сериозноста на нејзините повреди со последиците од сообраќајна несреќа при голема брзина, а биле пронајдени и докази за употреба на оружје.
Беван се бранеше тврдејќи дека девојчето паднало од скали откако го бутнало семејното куче. Сместувањето на Беван, долгогодишен зависник од дрога, во домот на нејзината мајка Синед Џејмс се случи само неколку месеци пред трагичниот настан, само неколку дена по нивното запознавање преку Facebook.
Мајката на девојчето: „Тој е чудовиште“
Беван, родум од Абериствот, до крајот ја негираше вината за убиството, но во 2023 година беше прогласен за виновен и осуден на доживотен затвор со минимална казна од 28 години. Мајката на Лола, Синед Џејмс, беше осудена на шест години затвор поради предизвикување или дозволување на смртта на детето. За време на судењето таа го опиша Беван како „чудовиште“ кое „треба да гние во пеколот“ бидејќи ѝ ја одзел ќерката.
Полицијата од Вест Јоркшир денес соопшти дека за убиството на Беван се обвинети Марк Фелос (45), Ли Њуел (56) и Дејвид Тејлор (63). Сите тројца се задржани во притвор и денес треба да се појават пред Прекршочниот суд во Лидс.
Овој инцидент се случи помалку од еден месец откако во истиот затвор беше убиен педофилот и пејач на бендот Lostprophets, Иан Ваткинс. За неговото убиство беа обвинети затворениците Рашид Гедел (25) и Самуел Додсворт (43), додека уште двајца мажи беа уапсени поради сомневање за заверa за убиство.
