Иако секој од Светите големи Апостоли има свој посебен ден за празнување во годината, сепак овој ден Црквата го одреди како соборен празник на сите заедно, а со нив и Павле.
Ова се имињата и деновите на посебното празнување на Дванаесеттемина: Петар – 29 јуни и 16 јануари; Андреј на 30 ноември; Јаков Заведеев на 30 април; Јован Богослов на 26 септември и на 8 мај; Филип на 14 ноември; Вартоломеј на 11 јуни и на 25 август; Тома на 6 октомври; Матеј евангелистот на 16 ноември; Јаков Алфеев на 9 октомври; Тадеј на 19 јуни; Симон Зилот на 10 мај; Матиј на 9 август; Павле на 29 јуни.
Да спомнеме уште за начините како секој од овие најсвети и најполезни луѓе во историјата на светот го заврши својот живот на земјата: Петар беше распнат на крст главечки; Андреј беше распнат; Јаков Заведеев го убија со меч; Јован Богослов се упокои чудесно; Филип беше распнат на крст; Вартоломеј – распнат, па одран и заклан; Тома беше избоден со пет копја; Матеј го изгореа во оган; Јаков Алфеев – распнат на крст; Тадеј – распнат; Симон Зилот – распнат; Матиј го каменуваа, па мртов го расекоа со секира; Павле го убија со меч.
Павловдан не е со црвена буква во православниот календар, туку се почитува како втор ден од Петровдан, а тој ден не се работи на нива.
Домаќинките не вршат домашна работа, како перење алишта и чистење на домот, а обичај е и да се замесува тесто на Петровдан и на Павловдан – петровача, односно колач со јаболка.
Во црковната проповед за Павловдан се наведува дека е тешко да се расправа со безбожниците, како и да се разговара со безумните и да се убедува гневниот.
Ако безбожноста, глупоста и злобата потекнуваат од незнаење, тоа незнаење е како бес, кој најбрзо го контролира милосрдието.
„Ако лут човек ве гони, не е човекот, туку ѓаволот кој ве гони. Човекот е нежен по природа. Ѓаволот ве предизвикува на долги расправии и бесплодни разговори, но тој бега од добро дело. Направете добро дело во Христовото име, а ѓаволот ќе бега, а потоа ќе треба да се занимавате само со луѓе, со вистински луѓе – побожни, интелигентни и нежни. Но, сè што правите, правете го во името на Господа“, се наведува во проповедта на овој ден.
