Младиот Дмитро Олијник, кој пред три години побегна од воените дејствија во Украина и својот нов дом го засноваше во Скопје, во гостувањето на 4TV.mk говореше за процесот на адаптација и топлиот прием од македонските граѓани.
Иако дошол во непозната средина, Дмитро денес одлично зборува македонски јазик и вели дека социјализацијата му поминала многу полесно од очекуваното.
Јазикот не бил бариера, туку мост
Иако не го познавал македонскиот јазик пред да пристигне, Дмитро успеал да го совлада за рекордно време. Тој посочува дека сличноста меѓу македонскиот и украинскиот јазик му помогнала уште во првите денови да воспостави основна комуникација со луѓето.
„Јазикот го научив тука бидејќи е доста сличен со украинскиот. На почетокот зборувавме пополека со луѓето и некако успевавме да се разбереме. Тоа ми помогна многу побрзо да се вклопам во секојдневието“, вели Дмитро.
Македонската гостопримливост како клуч за нова иднина
Најголемиот предизвик за секој бегалец е градењето на животот од нула, особено создавањето нов круг на пријатели. Дмитро истакнува дека отвореноста на Македонците му била најголемата поддршка во тие моменти.
„Со пријатели почнав да градам сè од нула. Фала му на Бога, Македонците се многу отворени луѓе и затоа многу брзо се снајдов. Почувствував искрена поддршка и тоа ми овозможи многу брзо да се социјализирам. Иако домот во Украина е нешто што не се заменува, веќе овде се чувствувам како дома“, искрен е тој.
Мала држава со голема убавина
Дмитро не крие дека Македонија го изненадила со својата природа и менталитет. Иако доаѓа од Украина, која е просторно најголемата европска држава, тој вели дека големината на Македонија не го дефинира нејзиниот квалитет.
„Македонија многу ми се допадна – и луѓето и природата. Можеби е мала држава, но е навистина многу убава во сите аспекти. Тоа е нешто што можеби не го очекував, но навистина ме воодушеви“, заклучува Дмитро во својата приказна за интеграцијата во македонското општество.
Целата емисија во продолжение: