Повратот на ДДВ преку апликацијата „МојДДВ“ за третото тримесечје од 2026 година треба да биде исплатен најдоцна до крајот на ноември. Граѓаните кои скенирале фискални сметки во периодот од јули до септември може да добијат до 2.100 денари, во зависност од остварениот поврат.
Засега, Управата за јавни приходи нема објавено точен датум кога ќе започне исплатата. Таа ќе зависи од обработката на податоците и реализацијата на налозите за префрлање на средствата на сметките на корисниците.
Износот што ќе го добие секој граѓанин се пресметува според бројот и вредноста на прифатените фискални сметки, како и според износот на пресметаниот данок на додадена вредност. Според правилата на „МојДДВ“, за купени македонски добра и услуги се враќаат 20 проценти од пресметаниот ДДВ, додека за останатите добра и услуги повратот изнесува 10 проценти.
Доколку сите четири члена на едно семејство се регистрирани корисници на апликацијата и го остварат максималниот поврат, заедно можат да добијат до 8.400 денари за едно тримесечје.
Пред исплатата, граѓаните треба да проверат дали во апликацијата имаат внесено точни податоци за трансакциската сметка. Ова е особено важно за оние кои во меѓувреме ја смениле банката или ја затвориле сметката што претходно ја користеле. Неточните или неажурирани податоци може да предизвикаат доцнење на исплатата, иако фискалните сметки биле скенирани навреме.
Мерката „МојДДВ“ продолжува да се спроведува и во 2026 година. Според претходно објавените податоци, во текот на 2025 година на граѓаните им биле вратени повеќе од 3,47 милијарди денари, односно околу 56,4 милиони евра.