Претседателот на босанско-херцеговачкиот ентитет РС, Милорад Додик, на 3 април 2025 година предложи Босна и Херцеговина да ги укине царините на стоките од Соединетите Американски Држави, со цел отворање пат за договор за слободна трговија меѓу двете земји.
На мрежата X, Додик напиша дека со овој потег ќе се создадат „услови за постигнување на договор за слободна трговија меѓу БиХ и САД, што би значело нулта царина“.
„Тоа би овозможило понатамошен развој на нашата економија“, додаде тој.
Предлогот на Додик доаѓа по најавата на американскиот претседател Доналд Трамп за воведување на нови царини за увоз од странство. Меѓу земјите на кои им се воведени царини е и Босна и Херцеговина, а според извршната наредба на Трамп, царината за БиХ изнесува 35 проценти.
Трамп во средата повика на универзална основна царина за сиот увозен производ и дополнителни царини насочени кон земјите со значителен трговски суфицит со САД.
Сè уште нема официјален одговор од државните институции или американската влада.
