Претседателот на САД Доналд Трамп ги повика американците да ги штитат слободите што, како што рече, ги замислувале основачите на државата пред 250 години, предупредувајќи на „комунистичката закана“ што, според него, доаѓа од прогресивното крило на Демократската партија, пренесе Ројтерс.
Говорејќи во навечерието на Денот на независноста пред националниот меморијал Маунт Рашмор во Јужна Дакота, Трамп истакна дека „стоиме во подножјето на споменикот на овие херои — навистина неверојатна група луѓе — и повторно се посветуваме на целта да бидеме нација толку голема, смела, достојна и величествена како овие американски гиганти“. Тој зборуваше пред гранитните карпи во кои се врежани ликовите на четворица американски претседатели.
„Денес има возобновување на комунистичката закана на нашата земја, вклучувајќи и од новодојденци кои прифаќаат идеи што се во целосна спротивност со нашиот начин на живот и нашиот забележлив успех. Нема да дозволиме тоа да се случи“, изјави претседателот, додавајќи дека американскиот идентитет е изложен на „нова атака“ од „радикали и екстремисти“ во внатрешноста на земјата, јави Франс прес.
Во последната недела Трамп повеќепати предупреди на растечкото влијание на поддржувачите на демократскиот социјализам. Во говорот синоќа тој ја изнесе најфокусираната аргументација по таа тема во време кога Американците се соочуваат со висока инфлација и скапи горива по почетокот на американско-израелската војна со Иран. Загрижени дека конфликтот може да ѝ го одземе на партијата контролниот удел во најмалку еден од двата дома на Конгресот на изборите на сред мандат во ноември, законодавците од Републиканската партија посочуваат на низата успеси на левичарски кандидати од Демократската партија, забележува Ројтерс.
Трамп ја поврза својата антикомунистичка реторика и со темата за имиграцијата, која придонесе за неговите изборни успеси и историски е дел од критиките кон комунизмот во САД. Во еден момент од говорот тој изјави дека новодојденците што ги прифаќаат тие идеи треба да бидат протерани. „Ја изјавуваме нашата решителност и им ветуваме на сите дека граѓаните на САД брзо ќе го поразат комунизмот… Ќе ги протераме брзо и ќе продолжиме да ја градиме нашата земја за да стане поголема, подобра и посилна од кога било. Америка никогаш нема да биде комунистичка држава!“, рече Трамп, по што веднаш премина на темата за претстојните избори: „Можеме да ги изгубиме изборите на сред мандат само ако си дозволиме да ги изгубиме.“
Минатата недела четворица кандидати од прогресивното крило, меѓу кои тројца демократски социјалисти, победија на жестоки внатрепартиски избори на Демократската партија во Њујорк, а во вторник и во Колорадо. Претставници на прогресивното крило забележаа победи и во Кентаки, Њу Џерси, Охајо, Пенсилванија и Тексас. Уште минатата недела Трамп ги оцени овие победи како „најголемата закана за земјата од нејзиното основање“.
Денес се очекува претседателот да им се обрати на сограѓаните во паркот Националниот Мол во Вашингтон, пред планираниот голем огномет, во услови на топлотен бран што ја отежна организацијата на прославите за Денот на независноста на 4 јули во голем дел од земјата. Во пределот на меморијалот Маунт Рашмор, меѓутоа, времето беше посвежо, со температура од само 18 степени Целзиусови.