Поранешниот премиер Зоран Заев ја прекина својата медиумска тишина и упати ултиматум до владејачката ВМРО-ДПМНЕ и пратеникот Бране Петрушевски. Тој бара итно јавно извинување за, како што вели, континуираните лаги и конструкции, во спротивно најавува тужба за клевета.
Заев, кој потсетува дека веќе пет години е надвор од политиката, реагира на обвинувањата дека е вмешан во случајот со запленетиот медицински канабис поради несоодветно складирање.
„Безобразна лага е дека сум вртел во Царина“
Експремиерот категорично ги отфрла наводите дека интервенирал во институциите за случајот со марихуаната.
„Безобразна лага е дека сум на кој било начин поврзан со случаите со канабис што беа презентирани пред јавноста. Безобразна и дрска лага е дека сум се јавувал во Царинската управа“, дециден е Заев.
Облакодери во Дубаи и болницата „Жан Митрев“
Покрај актуелниот случај, Заев ги наброја и другите обвинувања кои кружат во јавноста откако ВМРО-ДПМНЕ е на власт, нарекувајќи ги „одвратни лаги“. Тој негира дека гради 40-катници во Дубаи или дека врши притисок за преземање на приватни болници.
„Без никаква срам… ги повторуваат лагите дека градам некакви облакодери од 40 ката во Дубаи, дека вршам притисок за купување на болницата на д-р Жан Митрев, дека се мешам во работата на правосудните и други институции“, стои во реакцијата.
„Никому не се одмаздив за 27 април, но сега е доста“
Заев потсети дека и покрај настаните од „Крвавиот четврток“, тој не барал одмазда и досега избегнувал тужби, борејќи се за слобода на говорот. Сепак, вели дека трпението му е при крај.
„Никому не сум му се одмаздил за она што ми го направија на 27 април во Собранието, никогаш не сум ја злоупотребил политичката позиција, но сега е доста! Ќе се борам со сите правни средства да ја симнам оваа дамка од моето име“, порача Заев.
