Повеќе од 500 инспекциски контроли биле спроведени низ државата во текот на изминатата недела, при што Државниот пазарен инспекторат (ДПИ) изрекол 210 прекршочни платни налози во вкупен износ поголем од 3,5 милиони денари.
Според податоците на ДПИ, во периодот од 20 до 26 јули 2026 година биле реализирани вкупно 518 инспекциски надзори. Најголем дел од контролите биле насочени кон угостителската дејност, каде што биле извршени 141 надзор и издадени 75 прекршочни платни налози.
Во областа на финансиската дисциплина биле спроведени 120 контроли, по кои биле издадени 50 налози, додека според Законот за трговија биле реализирани 104 инспекциски надзори и издадени 44 прекршочни налози.
Инспекторите извршиле и 36 надзори согласно Законот за занаетчиство, 16 според Законот за заштита на потрошувачите и 11 контроли според Законот за заштита од пушење, при што во последниот случај биле издадени осум прекршочни платни налози.
Покрај казните, инспекторатот изрекол и 26 опомени, по што во наредниот период ќе следуваат контролни надзори за проверка на постапувањето по укажаните неправилности.
Од Државниот пазарен инспекторат најавуваат дека редовните инспекциски контроли ќе продолжат и во наредниот период, како и постапувањето по пријавите што ги доставуваат граѓаните и институциите. Неправилности може да се пријават на бесплатниот телефонски број 191 или преку официјалната веб-страница на Инспекторатот.