Од денеска почна да работи ажурираниот Шенген информациски систем (SIS), пренесоа светските агенции, повикувајќи се на соопштение на Европската комисија. Европската база на податоци за барани или исчезнати лица, како и за илегални имигранти, е проширена во модернизирана верзија за да се овозможи доставување повеќе предупредувања.
„Денес започна со работа обновениот шенгенски информациски систем. Тоа е најобемниот систем за гранична контрола и размена на информации во Европа. Вклучува информации за барани или исчезнати лица, за државјани на трети земји кои немаат правна основа да бидат на територијата на ЕУ, како и за украден или исчезнат имот (оружје, возила, лични документи).Тоа е основата на најнапредниот светски систем за контрола на границите што го градиме“, соопшти Европската комисија.
Создаден во 1995 година, системот овозможува размена на информации меѓу националните власти на земјите од Шенген зоната, одговорни за безбедноста и имиграцијата во областа на слободното движење, каде што се укинати контролите на внатрешните граници, потсетува АФП.
Покрај фотографиите и отпечатоците од прсти, Шенгенскиот информациски систем веќе содржи „нови видови биометриски елементи“, како што се траги пронајдени на местата на злосторството и податоци од ДНК, но само во однос на исчезнатите лица, се вели во соопштението на ЕК.
Покрај известувањата за исчезнати лица, националните власти (полиција, царински службеници, граничари итн.) исто така може да внесуваат податоци за одредени категории на ранливи лица, како што се деца изложени на ризик од киднапирање или потенцијални жртви на трговија со луѓе.
За борба против илегалната имиграција, земјите од Шенген сега се обврзани да известуваат преку информацискиот систем Шенген кога ќе одлучат да вратат државјанин од трета земја кој нема законско право да остане во ЕУ, за да можат да проверат дали лицето навистина има ја напушти територијата на Унијата.
Новата, ажурирана верзија на Шенгенскиот информациски систем работи во 30 европски земји (26 земји-членки на ЕУ, како и земјите поврзани со Шенген зоната – Норвешка, Исланд, Швајцарија и Лихтенштајн).
Пристапувањето на Кипар во Шенгенскиот информациски систем е планирано за летото 2023 година.