Русија има капацитет во било кој момент да изведе ограничен напад на територија на НАТО, но одлуката за таков потег ќе зависи од ставот на западните сојузници, предупреди висок германски воен функционер.
„Ако ги погледнете сегашните способности и борбената моќ на Русија, таа би можела веќе утре да започне напад помал обем на територија на НАТО“, изјави генерал-потпуковникот Александер Солфранк во интервју за Ројтерс.
„Мал, брз, регионално ограничен, ништо големо – Русија е премногу ангажирана во Украина за да го изведе тоа.“
Солфранк, кој е на чело на германската Заедничка команда за операции и го надгледува планирањето на одбраната, повтори и предупредувањата на НАТО дека Русија би можела да покрене широко распространет напад врз сојузот од 32 членки веќе во 2029 година, ако продолжи со напорите за јакнење на вооружувањето.
Претседателот Владимир Путин негира агресивни намери, тврдејќи дека руската инвазија на Украина во полн обем во 2022 година била чин одбрана од „експанзионистичките амбиции на НАТО кон Русија“.
Говорејќи во својот штаб — пространа касарна на север од Берлин — Солфранк рече дека, и покрај неуспесите во Украина, руското воздухопловство сè уште поседува значајна борбена моќ, додека нејзините нуклеарни и ракетни сили останале недопрени.
Иако Црноморската флота претрпе сериозни загуби, други руски флоти не се ослабнати, додаде тој.
„Копнените сили трпат загуби, но Русија тврди дека има намера да го зголеми вкупниот број припадници на 1,5 милиони. И Русија располага со доволно главни борбени тенкови за да го направи ограничениот напад возможен веќе утре“, рече Солфранк, додавајќи дека таков напад во моментов не се планира.
Солфранк дојде на чело на Заедничката команда за операции во 2024 година, што претставува значајна промена од експедициони мисии, како оние во Авганистан или Мали, кон повторен фокус на одбрана на територијата на НАТО.
Пред да ја преземе сегашната функција, Солфранк ја раководеше НАТО команда за логистика (JSEC) во германскиот град Улм.
Рускиот напад зависи од три фактори
Скорешните нарушувања на полскиот воздушен простор со дронови ги охрабрија западните стравувања од руска ескалација.
Порано годинава, Берлин го ублажи својот уставен „кочнички механизам за задолжување“ за да го исполни новиот цел на НАТО — издвојување 3,5 отсто од националниот БДП за воени расходи до 2029 година. Со тоа, трошоците за одбрана би се зголемиле од речиси 100 милијарди евра во 2025 на околу 160 милијарди евра (187 милијарди долари) до 2029 година.
Покрај тоа, Германија планира да ги прошири своите вооружени сили за 60.000 војници, со што вкупниот број би достигнал околу 260.000 припадници.
Солфранк рече дека евентуалната одлука на Москва да нападне НАТО ќе зависи од три фактори: воената моќ на Русија, нејзиниот воен учинок и нејзиното раководство.
„Тие три фактора ме водат до заклучок дека рускиот напад е во опсегот на возможното. Дали ќе се случи или не, во голема мерка зависи од нашето сопствено однесување,“ додаде тој, алудирајќи на напорите на НАТО за одржување на одвраќањето.
Генералот забележа дека хибридните воени тактики на Москва, вклучително и упадите со дронови, треба да се гледаат како поврзани елементи на поширока стратегија што го вклучува и војувањето во Украина.
„Русите ова го нарекуваат нелинеарно војување. Во нивната доктрина, тоа е војување кое претходи на употребата на конвенционално оружје. И тие се закануваат со нуклеарно оружје — што претставува војување преку заплашување“, рече Солфранк.
Целта на Русија, додаде тој, е истовремено да го провоцира НАТО и да ја испита неговата реакција, со цел „да поттикнува несигурност, да шири страв, да нанесува штета, да шпионира и да ја тестира отпорноста“ на сојузот.
