Поради голем пад на интернетот, бројни веб-страници, онлајн игри и апликации бележат проблеми, известува Sky News.
Меѓу нив се и Amazon, Snapchat, Roblox, Coinbase и Vodafone.
Проблемите започнаа утрово, а се чини дека причината е проблем со Amazon Web Services (AWS).
Според страницата Downdetector, која ги следи пријавите за веб-страници и веб-сервиси кои не работат, се покажува ненадејната и широко распространета природа на прекините. Само во САД се пријавени повеќе од 2000 случаи на прекин на услугите на AWS.
Компанијата соопшти дека забележува „зголемени стапки на грешки и доцнења кај повеќе AWS услуги“, пренесува Sky News.
„Активно работиме на ублажување на проблемите и откривање на причината. Новостите ќе ги објавиме за 45 минути или порано доколку имаме дополнителни информации за споделување“, соопштија од Amazon.
Причината за проблемот е Amazon Web Services, изјави извршниот директор на компанијата за вештачка интелигенција Perplexity.
„Perplexity во моментов не работи. Основниот проблем е со AWS. Работиме на негово решавање“, напиша Aravind Srinivas на X.
AWS се опишува како „најопсежна cloud услуга“ во светот.
Компаниите им овозможува виртуелна инфраструктура, давајќи им пристап до сервери, бази на податоци и складирање без потреба за градење на сопствена инфраструктура.
Се смета дека милиони компании користат AWS, па кога нешто ќе тргне наопаку, тоа може да има огромно влијание.
Меѓу услугите погодени од овој прекин се и некои банки, при што засега се пријавени проблеми со пристапот до онлајн сметки во Lloyds Bank, Halifax и Bank of Scotland.
