Во меѓународна акција Мамка запленети се фалсификувани пари вредни повеќе од 14 милиони евра, од кои хрватската полиција и царина откри 10 пратки со 1.803 фалсификувани банкноти евра во различни апоени, извести Управата на полицијата.
Во акцијата хрватската полиција и царина откри 256 банкноти во апоен од 20 евра, 424 банкноти од 50 евра, 408 банкноти од 100 евра, потоа 209 банкноти од 200 евра и 506 банкноти од 500 евра.
Полициската управа прецизира дека купувачи на фалсификувани банкноти се од Загреб, Карловац, Истра, Задар, Шибеник, Сплит, Сисак и Крапина, а пратките со фалсификувани банкноти се испорачуваат од Турција, Кина и САД.
Учествуваа 18 земји
Полицијата наведува дека во акцијата координирана од Европол учествувале органи на прогонот од 18 земји, а целта била да се прекине дистрибуцијата на фалсификувани банкноти и монети преку поштенските услуги низ Европа.
Во оперативната фаза запленети се 174 пакувања со фалсификувани пари, со што се започнати нови 144 полициски истраги на одговорни криминални мрежи. Пресретнати се вкупно 148.130 фалсификати, меѓу кои банкноти и монети од 134.949 евра, банкноти од 9.186 британски фунти и банкноти од 3.595 американски долари.
Огромното мнозинство од конфискуваните банкноти беа банкноти со изменет дизајн, кои често се нарекуваат „филмски пари“.
Ваквите репродукции се слични по форма и боја на вистинските пари, но на нив има мал белег што укажува дека не се работи за вистински пари. Сепак, ваквите ознаки често не се забележуваат, што им овозможува на криминалците таквите пари да ги префрлат како вистински.
Најчести фалсификати се банкнотите од 50 евра
Меѓу одземените банкноти, најчести апоени биле 50 евра, а потоа 20 евра.
Полицијата објасни дека криминалните организации често ги искористуваат разликите меѓу агенциите за спроведување на законот, особено кога користат поштенски услуги за дистрибуција на фалсификувани пари.
Тие додадоа дека царинските службеници биле клучна за откривање на фалсификувани банкноти и монети, додека полициските сили ги спроведувале потребните истраги за да ги пронајдат и разбијат одговорните криминални групи.
Благодарение на заедничката соработка, фалсификуваните пари беа пресретнати на клучните влезни точки и започнаа опсежни истраги во потрага по организирани криминални групи кои дејствуваат зад сцената.
Полицијата додаде дека Европол и ОЛАФ ја поддржале операцијата со олеснување на размената на разузнавачки податоци, помагајќи да се открие сомнителни пакети и специфицирајќи индикатори за ризик за идните напори за борба против дистрибуцијата на фалсификувани пари.
