Тринаесет деца од Основното училиште „Димо Хаџи Димов“ досега побарале медицинска помош на Клиниката за детски болести, а четири од нив се уште се хоспитализирани, но се во добра здравствена состојба, соопшти директорот на Клиниката, Реџеп Мемеди.
Целосно се завршени анализите на мострите од вода земени од училиштето, а физичко-хемиската и микробиолошката анализа покажуваат дека водата е во рамките на референтните вредности, без присуство на тешки метали, соопшти Институтот за јавно здравје (ИЈЗ).
Сепак, анализа на биолошки материјал од седум земени примероци од деца кои јавиле симптоми покажала присуство на норовирус кај шест од нив.
„Од мострите од храна и работни површини од училиштето беа пронајдени фекални бактерии Enterobacteriaceae во мусаката и на неколку површини од кујната и училиштето, што укажува на нехигиена“, соопшти ИЈЗ.
Дополнително, од девет чешми кои беа тестирани, три беа позитивни на бактериите од групата Enterobacteriaceae – едната во кујната и две во училници, истакна директорката на ИЈЗ, Марија Андоновска.
Директорот Мемеди потсети дека седум деца биле задржани на болнички третман со симптоми како стомачна болка, дијареа, повраќање и температура, а три од нив веќе се пуштени дома. Четири деца продолжуваат со болнички третман и се очекува до понеделник да бидат отпуштени, по добивање на целосно стабилна здравствена состојба.
По појавата на симптомите кај учениците, Инспекциските служби на ИЈЗ, Агенцијата за храна и ветеринарство (АХВ) и Државниот санитарен и здравствен инспекторат (ДСЗИ) спроведоа вонреден инспекциски надзор во училиштето поради сомнежи за труење.
ИЈЗ најавува дека за дополнителните мостри од другите девет училишта ќе информира во понеделник и дека е во постојана комуникација со надлежните институции за сите нови информации.
