Државниот завод за ревизија (ДЗР) објави шокантен извештај за работењето на Министерството за економија и труд за 2024 година. Ревизорите констатирале серија неправилности – од застарување на илјадници прекршочни предмети што го оштетиле буџетот за над 2 милиони евра, до целосен крах на ИТ системот и губење на податоци по хакерски напад.
Главната забелешка на ревизорите се однесува на неефикасноста во наплатата на казните. Поради несоодветно постапување и застарување на предметите, во државниот буџет не се слеале 2.078.000 евра.
- До ноември 2024 година, Комисијата донела решенија за запирање на дури 1.534 прекршочни постапки поради застареност.
- Иако Прекршочната комисија била формирана уште во 2019 година, таа започнала да постапува по предметите дури во 2022 година.
- Заклучно со мај 2025 година, од Државниот пазарен инспекторат (ДПИ) до Министерството се доставени вкупно 398 предмети за кои треба да се постапува.
Извештајот открива алармантна состојба со информациската безбедност. ИТ секторот во Министерството функционира со само 3 вработени (од предвидени 12), без соодветни безбедносни политики. Оваа негрижа резултирала со таргетиран ИТ напад во септември 2024 година, кој предизвикал недостапност на сите сервиси (мејлови, веб-сервер, бази).
- Иако системите биле обновени по 37 дена, дел од податоците, вклучувајќи ја електронската евиденција на предмети од Правниот сектор, се неповратно изгубени.
- Министерството користело застарени оперативни системи и немало доказ за исправност на резервните копии (бекап).
Ревизорите нотираат и проблеми со категоризацијата на угостителските објекти. Во 2025 година биле одземени лиценци за 2 диско клуба, 1 диско клуб на отворен простор и 8 кабареа. Сепак, документацијата за дел од лиценците не била достапна за ревизија поради тековна истражна постапка.+1
Исто така, утврдени се неправилности при набавката за оградување на фотонапонски централи. Втората фаза од договорот, вредна над 420.000 евра, не е реализирана, нема банкарска гаранција, а Министерството за енергетика покренало постапка за тужба против економскиот оператор.
