Израел изврши ракетни напади во Сирија јужно од главниот град Дамаск. Нанесена е материјална штета, но нема повредени, пренесе АФП, повикувајќи се на САНА.
Сириската државна новинска агенција цитираше воен извор кој вели дека противвоздушната одбрана на земјата пресретнала поголем дел од проектилите.
„Израелскиот непријател погоди од окупираната сириска Голанска висорамнина низ јужен Дамаск. Има само материјална штета“, изјави извор на САНА.
Дописникот на АФП синоќа слушнал силни експлозии во Дамаск.
На 20 мај, најмалку тројца сириски офицери беа убиени во израелски ракетни напади во близина на главниот град, соопшти невладина организација за набљудување. Според Сириската опсерваторија за човекови права, овие напади биле насочени кон иранските воени бази и складишта за оружје.
Петмина сириски војници беа убиени во израелските напади на 13 мај, а 10 беа убиени на 27 април, потсетува АФП.
Од почетокот на сириската војна во 2011 година, Израел изврши стотици воздушни напади во соседната земја врз позициите на сириската армија, иранските сили и либанското движење Хезболах. Израел ретко ги коментираше нападите, но посочи дека нема да дозволи Иран да му се заканува од сириска територија.
