Израелската војска убила најмалку 91 Палестинец, меѓу кои најмалку 35 деца, во нападите на Појасот Газа од синоќа, и покрај договорот за прекин на огнот, соопштија медицински извори, пренесува „Анадолу“.
Израелската војска убила 31 лице на северот, 42 во централните подрачја и 18 на југот на Појасот Газа. Во нападите се повредени десетици цивили, објави државната новинска агенција „Вафа“, повикувајќи се на извори од болниците во Газа.
Израелските удари погодиле куќи, шатори кои служеле како засолништа за раселени цивили, едно возило, засолниште и болница во рамките на таканаречената „жолта линија“, изјавиле медицински лица за агенцијата „Анадолу“.
„Жолтата линија“ се однесува на зоната до која израелските сили се повлекле во согласност со договорот за прекин на огнот. Таа физички го дели Појасот Газа на два дела и се наоѓа внатре во територијата на Газа — јужно од градот Газа и северно од Кан Јунис.
На северот на Газа погодени засолниште, куќи и џамија
На северот на Газа, израелската војска гаѓала училиште претворено во засолниште во областа Бејт Лахија, при што биле убиени три цивили, а повеќе лица се ранети.
Израелската војска гранатирала две куќи во населбата Ал-Наср, во бегалскиот камп Шати, во западниот дел на градот Газа, при што биле убиени осум лица.
Нов израелски напад во средата наутро погодил џамија која служела како засолниште за раселени лица во населбата Сабра во градот Газа, изјавиле сведоци за агенцијата „Анадолу“.
Две лица биле убиени, а десет ранети во населбата Зајтун во Газа. Неколку цивили сè уште се водат како исчезнати под урнатините на куќа погодена од израелската војска, додека повеќе лица биле повредени во уште еден напад југозападно од Зајтун.
Израелската војска убила мајка и дете во населбата Тел ал-Хава во Газа.
Четворица загинале во напад на шатор
Во централниот дел на Газа, четири лица го загубиле животот откако израелски напад погодил нивен шатор во Деир ал-Балах.
Шест лица загинале, а повеќе биле повредени кога израелски авиони бомбардирале училиште претворено во засолниште и куќа во бегалскиот камп Бурејџ.
Пет лица биле убиени во нападите на повеќе домови во бегалскиот камп Нусеират.
Во сличен напад, девет лица — меѓу нив четири деца — биле убиени, а девет се водат како исчезнати под урнатините на куќа погодена од израелската војска во кампот Нусеират.
Осум лица, меѓу кои тројца деца, биле убиени во израелски напад на шатори во кои биле сместени раселени семејства во областа Ал-Маваси, на запад од Кан Јунис, во јужниот дел на Газа.
Медицински извори наведуваат дека бројот на загинати би можел да се зголеми, бидејќи многу од повредените се во критична состојба, а потрагата по исчезнатите под урнатините сè уште трае.
