На Јамајка досега загинале три лица додека островот се подготвува за ураганот Мелиса, кој според експертите е најсилната бура во светот оваа година, а можно и најмоќната некогаш забележана во овој регион.
Американските метеоролози предупредуваат на „катастрофални и по живот опасни услови“.
Со брзина на ветерот до 282 километри на час, ураганот Мелиса е класифициран како ураган од петта категорија – највисокото можно ниво.
Бурата дополнително засилува и се очекува денеска да го погоди карипскиот остров.
Според Националниот центар за урагани на САД (NHC), врз основа на максималната брзина на ветерот и нискиот атмосферски притисок, Мелиса е најсилната бура во светот за 2025 година.
Премиерот: „Ќе ни бидат потребни повеќе ресурси отколку што Јамајка располага“
Премиерот Ендру Холнес изјави за CNN дека обновата по ураганот ќе бара многу повеќе ресурси отколку што државата има на располагање.
„Островот подготви повеќеслоен одговор и имаме доволно храна и хуманитарни залихи за првите две недели, но долгорочно ќе ни биде потребна меѓународна помош“, рече тој.
Тој предупреди на големи оштетувања на патиштата, мостовите, канализационите системи, како и на можни штети на пристаништата и аеродромите.
На островот се подготвени 850 засолништа, кои можат да примат над 20.000 лица.
Мелиса би можела уште повеќе да засили
Иако веќе е ураган од петта категорија, најновите податоци покажуваат дека атмосферскиот притисок паднал од 909 на 901 милибар, што значи дека бурата станува уште посилна.
За споредба, ураганот Катрина што ја погоди Америка во 2005 година имаше притисок од 902 милибара.
Очекувана насока на движење
Националниот центар за урагани предвидува дека средиштето на ураганот Мелиса ќе помине преку Јамајка и Куба, а потоа ќе се движи кон бреговите на Ел Салвадор.
Евакуирани 1.000 лица од американската база Гвантанамо Беј
Американската воена база Гвантанамо Беј на Куба се наоѓа на очекуваната патека на ураганот, поради што САД евакуираа околу 1.000 лица од персоналот кој не е од суштинско значење.
Во базата останале приближно 3.000 лица.
„Внимателно го следиме движењето на бурата и преземаме сите неопходни мерки за безбедност на персоналот“, изјави командантот Џон Хјуит.
