Министерството за образование и наука подготвува посебна национална концепција за рана детекција и работа со талентираните и надарените ученици, а воедно преку воведувањето на целодневната настава и воннаставните активности се отвора простор за поголема индивидуална поддршка како за талентите, така и за децата со попреченост и потешкотии во учењето. Ова го истакна министерката за образование и наука, Весна Јаневска, во гостувањето во емисијата „Ноќно студио“ на телевизија „4ТВ“, одговарајќи на прашања поврзани со реформите во образовниот систем.
Одговарајќи на прашање од граѓани за потребата од системски пристап кон генијалните и талентирани деца, како и рамноправна грижа за децата со попреченост на кои им е неопходна образовна поддршка, министерката посочи дека овие категории ученици веќе не се изоставени од институционалниот фокус.
Се подготвува концепција за рана детекција на таленти
Јаневска откри дека работна група при Бирото за развој на образованието (БРО) веќе неколку месеци активно работи на креирање посебна концепција за талентирани ученици.
„Работната група интензивно се среќава и концепцијата е во фаза на изработка. Очекувам во блиска иднина да биде завршена, по што ќе започнеме со организиран систем за рана детекција на талентирани деца. Покрај тоа, ги обучуваме наставниците, а дополнително ќе се спроведат и специјализирани обуки за работа токму со талентираните ученици“, најави Јаневска.
Таа потсети дека со законските измени донесени изминатата година се исправи долгогодишна неправда, овозможувајќи им и на основниците и на средношколците да добиваат парични награди за освоено прво, второ или трето место на меѓународните олимпијади по природни науки, математика, информатика и физика. Дополнително, државата воведе принцип со кој Министерството целосно ги покрива патните трошоци и престојот за сите ученици и нивните ментори кои учествуваат на меѓународни натпревари.
Индивидуален пристап преку целодневна настава: Поддршка за секое дете
Во интервјуто за „4ТВ“, министерката образложи дека оптимизацијата на училишната мрежа и воведувањето едносменска и целодневна настава ќе овозможат наставниот кадар да се посвети на децата според нивните лични потреби.
Наместо создавање технолошки вишок поради намалениот број ученици, наставниците ќе бидат ангажирани во додатна и дополнителна настава, слободни изборни предмети и воннаставни секции:
- Поддршка за децата со попреченост и учениците со потешкотии: Преку подолгиот престој во училиштето, наставниот кадар и стручните служби ќе можат индивидуално да им помогнат на учениците за совладување на наставниот материјал, изработка на задачите и целосна инклузија во училишната заедница, без потреба децата да носат обврски дома.
- Препознавање на афинитетите преку кариерни советници: Од оваа учебна година во основните и средните училишта се воведени кариерни советници. Нивната цел, заедно со наставниците, е да го препознаат примарниот интерес и дарба на секое дете и да го стимулираат да развива креативни способности и практични вештини во таа конкретна област.
„Секое дете има свој посебен талент и не секое дете покажува интерес за секоја наука. Улогата на наставниците, стручните служби и кариерните советници е токму таа – да го препознаат потенцијалот кај секое дете, да му дадат простор да напредува и да создадеме образовна средина во која ниту еден талент нема да биде запоставен, а секое дете на кое му треба помош ќе ја добие потребната поддршка“, порача министерката Јаневска во интервјуто за „4ТВ“.