Жителите на овој град се позадоволни од местото каде што живеат отколку луѓето било каде на друго место во светот.
Порталот Time Out пишува дека локалното население секогаш најдобро знае, па затоа, кога одлучиле да ги изберат најсреќните градови во светот, отишле директно до изворот и анкетирале повеќе од 18.000 луѓе за тоа колку високо го оценуваат својот роден град.
Учесниците во анкетата ги оценувале своите градови според неколку клучни критериуми – ноќниот живот, храната, пристапноста за пешаци и квалитетот на живот. Врз основа на тоа, уште во јануари биле прогласени најдобрите градови во светот воопшто, но посебно било поставено и прашањето за среќата. Луѓето требало да се изјаснат колку се согласуваат со следните изјави:
– Мојот град ме прави среќен;
– Се чувствувам посреќно во мојот град отколку на други места каде што сум бил или живеел;
– Луѓето во мојот град изгледаат среќно;
– Наоѓам радост во секојдневните искуства што ги нуди мојот град;
– Чувството на среќа во мојот град во последно време значително порасна.
По обработката на податоците, било утврдено дека најсреќен град во светот, според мислењето на неговите жители, е Абу Даби!
Дури 99 проценти од луѓето во престолнината на Обединетите Арапски Емирати изјавиле дека нивниот град ги прави среќни. Не може секој да се направи среќен, но Абу Даби е многу блиску до тоа.
93 проценти од жителите на Абу Даби рекле дека се посреќни дома отколку било каде на друго место во светот, додека 96 проценти се согласиле дека и нивните соседи делуваат ведро. Не е чудно што луѓето таму се толку позитивни, бидејќи градот е меѓу водечките и по пристапност за пешаци, зелените површини и културата.
Главната уредничка на Time Out Абу Даби, Маријана Серкеира, ја истакнала и гастрономската сцена на градот и неговите прекрасни плажи, велејќи:
„Абу Даби можеби е малку помирен од Дубаи, но верувајте – воопшто не е здодевен.“
Таа го препорачува островот Саадијат за одмор покрај море, Гугенхајм Абу Даби за љубителите на уметноста и релаксирачки вечери со „величествени зајдисонца над Арапскиот Залив“.
На второ место на листата на најсреќни градови се најде колумбискиот Меделин, каде што 97 проценти од жителите изјавиле дека наоѓаат „радост во секојдневните искуства“, додека Кејптаун, кој Time Out го прогласи за најдобар град за 2025 година, го зазел третото место.
