Во кафулето Гато, во центарот на Рио де Жанеиро, се служи кафе и чај, а друштво ви прават мачки. И не само тоа, сè во ова кафуле е за мачки и секогаш можете да си одите дома со една од нив.
Помеѓу розовите ѕидови со портрети на мачки, можете да нарачате доцно кафе со нивната силуета во пена, а ќе добиете и колаче во облик на шепа.
Кафулињата со мачки првпат станаа популарни во Азија, а првпат беа отворени во Тајван во 1998 година. Меѓутоа, она што го прави кафето Гато посебно е тоа што функционира и како место за посвојување на напуштени мачки кои биле спасени од организацијата наречена „Bigodes do Bunker“, пренесува Ројтерс.
Во текот на 2019 година во Бразил имало 78 милиони домашни миленици, главно кучиња и мачки, покажуваат податоците на бразилскиот институт кој се занимава со домашни миленици. Бидејќи многу сопственици починаа за време на пандемијата, а многу семејства поминаа низ хаотична финансиска ситуација, многу животни беа напуштени и оставени сами да се грижат.
„Во Бразил има повеќе од 10 милиони бездомни мачки и мислам дека финансиските тешкотии предизвикани од пандемијата за жал ја зголемија оваа бројка“, рече Џована Молинаро, која инспирирана од слично кафуле во Јапонија, го основа ова место.
„Има и други кафулиња за мачки во светот, но тука сме фокусирани на посвојувањето и благосостојбата на нашите мачки“, изјави таа за Ројтерс.
