Портпаролот на кинеското Министерство за надворешни работи Мао Нинг денеска ги отфрли сугестиите на американската Централна разузнавачка агенција (ЦИА) дека пандемијата на Ковид-19 е предизвикана од вирус што протече од лабораторијата.
„Заклучокот дека истекувањето од лабораторијата е малку веројатно е направен од заеднички експертски тим на Кина и СЗО (Светска здравствена организација) врз основа на теренски посети на релевантни лаборатории во Вухан“, рече Мао на прес-конференција, пренесе порталот Политико.
Тој додаде дека тоа го препознала меѓународната заедница и научната заедница.
Според наодите од неколку студии, вирусот се појавил природно и можеби се проширил меѓу луѓето кои биле изложени на заразени животни продадени на пазар во кинескиот град Вухан.
Но, властите во Вашингтон се сомневаат дека вирусот можеби потекнува од лабораторија, пред да истече во населението и да предизвика пандемија во која починаа неколку милиони луѓе.
ЦИА во саботата оцени дека е „поверојатно“ дека пандемијата на Ковид-19 потекнува од лабораторија отколку во природа, рече портпаролот на Агенцијата.
Американската агенција со години наведуваше дека не може да заклучи дали Ковид-19 е резултат на лабораториски инцидент или настанал во природа.
Но, во последните недели од администрацијата на Бајден, поранешниот директор на ЦИА Вилијам Барнс побара од аналитичарите и научниците на ЦИА да донесат јасна одлука, нагласувајќи го историското значење на пандемијата, рече висок американски функционер.
ЦИА тогаш изјави дека има „ниска доверба“ во својата проценка дека „потеклото на пандемијата на Ковид-19 од лабораторија е поверојатно“ и во својата изјава истакна дека и двете сценарија – и лабораториско потекло и природно потекло – остануваат веројатни.
