Кина ја одобри изградбата на најголемата хидроцентрала во светот, со што започна амбициозен проект на источниот раб на Тибетската висорамнина, кој може да влијае на милиони луѓе во Индија и Бангладеш.
Според проценката на Power Construction Corp of China за 2020 година, браната, која ќе се наоѓа во долниот тек на реката Јарлунг Кангпо, би можела да произведува 300 милијарди киловат-часови електрична енергија годишно.
Ова е повеќе од тројно од 88,2 милијарди kWh, колку што е проектираниот капацитет на најголемата хидроцентрала во светот, Трите клисури во централна Кина.
Проектот ќе игра важна улога во исполнувањето на целите на Кина за јаглеродна неутралност, ќе ги зајакне поврзаните индустрии како што е инженерството и ќе создаде работни места во Тибет, објави во средата официјалната новинска агенција Синхуа.
Дел од реката Јарлунг Кангпо се спушта на драматични 2.000 метри на краток распон од 50 километри, нудејќи огромен хидроенергетски потенцијал, но и уникатни инженерски предизвици.
Трошоците за изградба на браната, вклучувајќи ги и инженерските трошоци, исто така се очекува да ја надминат браната Три клисури од 35 милијарди долари. Таа сума вклучуваше преселување на 1,4 милиони луѓе и беше четири пати поголема од првичната проценка.
Властите не посочија колку луѓе би требало да бидат раселени поради проектот или како тој би влијаел на локалниот екосистем, еден од најбогатите и најразновидните на платото.
Според кинеските власти, хидроенергетските проекти во Тибет, за кои тврдат дека имаат повеќе од една третина од хидроелектричниот потенцијал на Кина, нема да имаат големо влијание врз животната средина или снабдувањето со вода.
Индија и Бангладеш сè уште се загрижени за браната бидејќи проектот потенцијално ја менува не само локалната екологија, туку и текот на реката.
Јарлунг Кангпо станува река Брамапутра кога излегува од Тибет и тече на југ во индиските држави Арунчал Прадеш и Асам, и на крајот во Бангладеш.
Кина веќе започна со изградба на хидроцентрали на горниот тек на реката Јарлунг Кангпо, која тече од запад кон исток во Тибет и планира уште проекти возводно, пишува Пословни.хр.
