На својата 112. седница, Собранието со 69 гласа „за“ ја изгласа реконструкцијата на владиниот кабинет предводен од премиерот Христијан Мицкоски. Новиот состав носи комбинација од искусни кадри од коалиционите партнери, академски професори и докажани професионалци од јавниот сектор.
Во продолжение ви ги претставуваме биографските детали и професионалниот пат на новите членови на Владата.
Борче Серафимовски – Министерство за земјоделство, шумарство и водостопанство (ЗНАМ)
Борче Серафимовски во министерската фотелја доаѓа од позицијата државен секретар во истото министерство.
- Образование: Серафимовски има исклучително богата академска биографија. Тој е дипломиран дефендолог на УКИМ, бизнис менаџер на Варненскиот слободен универзитет во Бугарија, магистер по меѓународни односи (Благоевград) и докторант по организациски науки (Велико Трново).
- Кариера: Во својата професионална кариера бил и генерален директор и заменик-претседател на Управниот одбор на Меѓународниот славјански универзитет во Свети Николе.
- Јазици: Зборува англиски, руски и бугарски јазик.
Сашо Клековски – Министерство за здравство (ВМРО-ДПМНЕ)
Сашо Клековски го презема здравствениот ресор откако претходно успешна ја извршуваше функцијата директор на Фондот за здравствено осигурување (ФЗОМ).
- Образование: Дипломирал на Медицинскиот факултет при УКИМ во Скопје, а има завршено и МБА академска програма на Универзитетот Американ Колеџ Скопје (УАЦС).
- Кариера: Клековски е добро познато име во граѓанскиот сектор и јавниот живот. Беше прв ко-претседател на Заедничкиот консултативен комитет на граѓанското општество меѓу ЕУ и Македонија (2007-2010), а од 2013 до 2016 година предаваше претприемнички финансии на УАЦС. Учествувал во подготовката на клучни државни стратегии за борба против корупцијата и соработка со невладиниот сектор. Јавноста го препознава и како долгогодишен колумнист во весникот „Нова Македонија“.
Ѓоко Велковски – Министерство за социјална политика, демографија и млади (ВМРО-ДПМНЕ)
Досегашниот заменик-министер во овој ресор, Ѓоко Велковски, доаѓа на местото на разрешениот Фатмир Лимани.
- Образование: Дипломиран економист на катедрата за Надворешна трговија при Економскиот факултет на УКИМ.
- Кариера: Велковски има огромно институционално искуство во секторот за труд и социјала. Беше министер во техничката влада (јануари – мај 2024), како и секретар на Град Скопје (2021-2023). Во Министерството за труд и социјална политика (МТСП) низ годините ги поминал речиси сите скалила – од соработник за јавни набавки, преку внатрешен ревизор, до посебен советник и кабинетски службеник за трудово право.
Јетон Шасивари – Министерство за правда (ВРЕДИ)
Новиот министер за правда, Јетон Шасивари, е истакнат експерт кој доаѓа директно од академската сфера.
- Образование: Доктор по уставно и управно право на Правниот факултет при Универзитетот на Југоисточна Европа (УЈИЕ) во Тетово.
- Кариера: Од 2002 година работи како редовен професор на УЈИЕ. Тој е заменик-член на државата во престижната Венецијанска комисија при Советот на Европа. Шасивари беше дел од претседателската група уставни експерти за време на КОВИД-19 пандемијата, а како надворешен советник на претседателот на Собранието работеше на изработката на новиот собраниски Деловник. Предава и во Академијата за судии и јавни обвинители.
- Јазици: Зборува англиски јазик.
Иван Стоилковиќ – Министерство за локална самоуправа (ВМРО-ДПМНЕ)
Досегашниот вицепремиер и министер за односи меѓу заедниците, Иван Стоилковиќ, седнува во министерското столче во локална самоуправа на местото на Златко Перински.
- Образование: Дипломиран правник на Правниот факултет „Јустинијан Први“ во Скопје. Својата надградба ја насочува во безбедноста и стратешките комуникации во Центарот „George Marshall“ во Германија и преку програма на USAID во Вашингтон, САД.
- Кариера: Покрај неговата неодамнешна вицепремиерска функција, Стоилковиќ има импресивен пратенички стаж од цели 22 години (2002-2024), каде што бил член на Уставната комисија, како и на комисиите за одбрана, безбедност и европски прашања. Пред да влезе во политиката, успешно раководел со приватно градежно претпријатие.
Агон Ферати – Министерство за односи меѓу заедниците (ВРЕДИ)
Агон Ферати е нов кадар кој ќе раководи со ресорот за односи меѓу заедниците.
- Образование: Магистер по бизнис администрација (УЈИЕ), со завршена специјализација за одржливи, отпорни и инклузивни јавни услуги на Универзитетот во Лунд, Шведска.
- Кариера: Има богато практично искуство во локалната самоуправа и меѓународните проекти. Од 2012 година работи како советник за ЕУ-проекти во Општина Тетово, а во периодот 2023-2024 година бил ангажиран како експерт за ЕУ Поглавјето 8 (Политика на конкуренција) во канцеларијата на УНОПС во Скопје.
- Јазици: Зборува англиски јазик.
Седат Сулејмани – Министерство за култура и туризам (ВРЕДИ)
Седат Сулејмани доаѓа на местото на разрешениот Зоран Љутков во ресорот култура и туризам.
- Образование: Дипломирал социолошки науки по педагошка теологија на Универзитетот „Улудаг“ во Бурса, Турција.
- Кариера: Овој ресор му е одлично познат на Сулејмани, бидејќи ја извршуваше функцијата заменик-министер за култура и туризам во два наврати (2020-2021 и 2024-2026). Во неговото портфолио стои и советничка позиција во Општина Тетово, менаџерска позиција во Турција, како и долгогодишно претприемачко искуство како сопственик и директор на приватни компании во Тетово.
Ерџан Демир – Министерство без ресор (ВМРО-ДПМНЕ)
Ерџан Демир е избран за нов министер без ресор на местото на Шабан Салиу.
- Образование: Дипломиран економист на Економскиот факултет при Европскиот универзитет во Скопје.
- Кариера: Демир доаѓа од позицијата национален координатор во Владата за креирање и следење на стратегии за немнозинските заедници. Претходно бил член на Управниот одбор на ЈП „Комунална хигиена“ – Скопје, а речиси 14 години работел како проектен менаџер во граѓанскиот сектор (Здружение „ФИЛЕО“). Има и богато менаџерско искуство во реалниот сектор на позиции поврзани со производство и автопревоз.