Авионот кој вчера принудно слета во водите на Мавровското Езеро е идентификуван како Piper PA-28-160 Cherokee, произведен пред повеќе од шест децении. Според официјалните документи од Федералната управа за авијација на САД (FAA), леталото носи американски регистарски ознаки N5005W.
Кој е сопственикот?
Увидот во американскиот регистар на цивилни воздухоплови открива дека официјален сопственик на леталото е Дукаѓин Манџука.
Во документите стои дека сопственикот е регистриран со адреса на живеење во Риџфилд Парк, Њу Џерси, САД. Ова објаснува зошто авионот носи ознака што започнува со буката „N“ (стандардна ознака за авиони регистрирани во САД), иако лета на македонското небо. Сертификатот за регистрација на ова име е издаден на 21 мај 2021 година и е валиден до 2028 година.
Реткост на небото: Авион со историска вредност
Податоците укажуваат дека станува збор за вистински “олдтајмер” кој е исклучително добро сочуван.
- Година на производство: Авионот е произведен далечната 1961 година.
- Сериски број: Интересен детал е серискиот број на леталото – 28-6. Ова е многу низок број, што сугерира дека овој примерок е еден од првите воопшто произведени модели од серијата PA-28, што му дава и колекционерска вредност.
- Мотор: Опремен е со клипен мотор од типот Lycoming O-320 Series, стандарден и докажан погон за овој тип летала.
Иако е произведен пред 63 години, статусот на леталото во американскиот регистар е наведен како „Valid“ (Валиден), што значи дека ги поседувало потребните административни дозволи за летање според американските регулативи.
Истрагата за причините за падот продолжува, но сега е јасно дека во инцидентот учествувал историски примерок на еден од најпознатите модели на „Piper“, управуван под американска регистрација.
