Бамбер и Пинат, златен ретривер и црн лабрадор кои поминале соодветна обука, можат да ја откријат Паркинсоновата болест преку мирисот на кожата со прецизност од 98%.
Две кучиња, Бамбер и Пинат, станаа најдобрите дијагностичари за Паркинсонова болест. Тие беа обучени да ја откриваат оваа невродегенеративна болест преку мирисот на кожата со години пред манифестацијата на симптомите со точност од 98%, како што се наведува во студијата објавена во научното списание The Journal of Parkinson’s Disease.
Кон рана дијагноза и навремено лекување Новите наоди на истражувачите од Универзитетите во Бристол и Манчестер, во соработка со добротворната организација „Medical Detection Dogs“, го отвораат патот за едноставна, неинвазивна дијагностичка метода. Со користење на соодветни биомаркери, ова ќе овозможи многу рано откривање на Паркинсоновата болест и ќе доведе до многу понавремено лекување кое ќе ја забави прогресијата на болеста.
Експертите од „Medical Detection Dogs“ ги обучија кучињата да идентификуваат кои примероци од себум (кожна маснотија) им припаѓаат на пациенти со Паркинсон, а кои на здрави лица. Во рамките на двојно слепо клиничко испитување, методот со кучиња-детектори покажа чувствителност од 80% и специфичност која достигна до 98%. (Чувствителноста се однесува на успешно откривање на позитивните резултати – давајќи што е можно помалку лажно негативни резултати, додека специфичноста се однесува на успешно откривање на негативните резултати – давајќи што е можно помалку лажно позитивни резултати).
Дополнително, беше значајно тоа што кучињата успеаја да ја детектираат болеста дури и во примероци од пациенти кои пателе од други здравствени проблеми.
Обуката на кучињата Кучињата беа обучувани неколку недели на повеќе од 200 примероци од мириси кои потекнувале од лица со дијагностицирана Паркинсонова болест, како и од волонтери кои не боледувале од неа. Кучињата добивале награда секој пат кога правилно ќе откриеле позитивен примерок или кога правилно ќе игнорирале негативен.
При двојно слепото испитување (каде само компјутер знаел каде се наоѓаат точните примероци), секоја серија примероци им била презентирана на кучињата и по обратен редослед. Примероците за кои кучињата не можеле да одлучат им биле повторно презентирани сè додека не се донесе одлука за сите.
Откривање на „мирисниот потпис“ на пациентите Имајќи предвид дека денес не постои апсолутно прецизен дијагностички тест за Паркинсон, идентификувањето на биомаркери може да помогне во раната дијагноза. Како што наведе Клер Гест, извршен директор на „Medical Detection Dogs“: „Денес нема тест за рана дијагноза, а симптомите можат да започнат и до 20 години пред да станат видливи и постојани. Раната дијагноза е клучна бидејќи навременото лекување може да ја забави еволуцијата на болеста и да го намали интензитетот на симптомите“.
Д-р Никола Руни, вонреден професор на Ветеринарниот факултет при Универзитетот во Бристол и главен автор на студијата, истакна: „Кучињата во нашата студија постигнаа висока чувствителност и специфичност и покажаа дека кај пациентите со оваа болест постои посебен мирисен потпис. Верувам дека кучињата можат да ни помогнат да развиеме брза, неинвазивна и евтина метода за идентификување на пациентите со Паркинсонова болест“.
