Државната комисија за спречување на корупцијата (ДКСК) денеска едногласно ја избра Маја Коневска за генерален секретар на институцијата. Коневска во моментот работи како раководител на секторот за стратешко планирање и интегритет во Комисијата.
Претседателот на ДКСК, Адем Чучуљ, објасни дека изборот на нов генерален секретар е потребен поради неговото назначување за претседател, со што му престанале претходните надлежности на таа позиција.
„Маја Коневска е дел од секретаријатот од 2005 година и има 20-годишно континуирано искуство. Во текот на својата кариера напредувала низ повеќе раководни позиции, од раководител на одделение до раководител на сектор, каде што е ангажирана и во моментот“, рече Чучуљ.
Тој додаде дека долгогодишниот ангажман на Коневска значително придонел за развојот на институцијата, особено во делот на меѓународната соработка, комуникацијата со граѓанскиот сектор и подготовката на клучни стратешки документи, меѓу кои државните програми и националните стратегии.
Чучуљ изрази уверување дека Коневска ќе се справи со предизвиците на функцијата генерален секретар и ќе ја унапреди работата на ДКСК.
