Македонија се најде високо на европската „црна листа“ кога станува збор за фемицид – убиство на жени од страна на нивните партнери или блиски. Според најновите податоци на Еуростат за 2023 година, земјава е рангирана на неславното трето место во Европа според стапката на вакви убиства.
Полоша статистика од нас имаат само две балтички земји:
- Летонија (највисока стапка): 17 убиени жени на милион жители.
- Литванија: 10 убиени жени на милион жители.
- Македонија: 6 убиени жени на милион жители.
Каде сме во споредба со регионот и ЕУ?
Веднаш зад Македонија на листата се наоѓа Босна и Херцеговина со стапка од 5 убиства на милион жители. Потоа следуваат развиени европски земји како Австрија и Обединетото Кралство, како и Украина, каде стапката изнесува 4.
Она што загрижува е фактот што Македонија е над европскиот просек. Податоците покажуваат дека во рамките на Европската Унија, просекот е 4 убиени жени на милион жители, додека кај нас таа бројка е 6.
Малта без ниту еден случај
На спротивниот крај од оваа тажна статистика се наоѓа Малта, каде во 2023 година не е регистриран ниту еден случај на фемицид. Позитивни примери во регионот се Грција и Црна Гора, кои имаат значително пониска стапка – само еден случај на милион жители.
Статистиката на Еуростат ја потврдува родовата димензија на насилството: додека стапката на убиени жени е висока, стапката на мажи убиени од партнери е значително помала и изнесува 2,2 на милион жители.
