Масовна потрага е во тек во бугарскиот град Царево по исчезнат метален сеф од локална компанија, кој наводно содржел два милиони лева и златни прачки. Плажите се затворени за јавност, багери копаат песок, а нуркачите го истражуваат морското дно. Полицијата ги спречува цивилите да учествуваат во пребарувањето.
Според локални медиуми, првите индиции за појава на банкноти се појавиле на една од градските плажи по катастрофалното невреме кое разурнало делови од крајбрежјето. Потоа се проширила гласина дека метален сеф исчезнал од фирмата „Авто Јани“, која се занимава со тешка механизација.
Градоначалникот на Царево, Марин Киров, изјави дека не е сигурно дали парите на плажата потекнуваат од сефот.
„Се тврди дека поплавниот бран однел метален сеф со документи и евентуално пари, но немаме официјална потврда за тоа. Општината не е вмешана во случајот“, рече Киров.
Полицијата и надлежните институции ги контролираат влезовите во градот, а само лица со валидна причина можат да влезат. Багери пребаруваат песок и тиња, додека нуркачите го истражуваат морското дно во близина на плажата.
Улиците на Царево се претвориле во сцена од крими-филм, а стотици граѓани кои се обиделе да се приклучат на потрагата се враќани уште на приодите кон градот.
Иако точната состојба со исчезнатиот сеф сè уште не е разјаснета, локалната заедница се соочува со вистинска „златна треска“ поради гласините за изгубеното богатство.
