Четиригодишната Елиза заедно со своите другарчиња дели ракавици за собирање на отпадот расфрлан низ Кањонот Матка. Им порачува на граѓаните отпадоците да ги фрлаат во корпа, а не на земја.
Акцијата започна во 8 часот наутро, а активистите ги чекаше многу работа. На иницијативата за расчистување на брегот на реката Треска ѝ се приклучија и јавните претпријатија „Паркови и зеленило“ и „Комунална хигиена“. Од таму велат дека често ја чистат оваа зона, но сепак, како што тврдат, несовесните граѓани постојано фрлаат отпад.
„Откако ќе исчистиме, за два дена повторно е полно со отпадоци. Треба да има чистота, но ние не знаеме да го одржуваме местото чисто“, изјави Шефки Шаќири – вработен во „Комунална хигиена“.
Иако во оваа зона нема доволно контејнери и корпи, од „Паркови и Зеленило“ и „Комунална хигиена“ ги обвинуваат граѓаните за степенот на нечистотијата.
„Го даваме максимумот и имаме 100% зголемување на обемот на работата. Но, одржувањето, како што кажа и директорот, треба да биде заедничко“, изјави Ардиан Муча – директор на ЈП „Паркови и зеленило“
Акцијата за чистење на Кањонот Матка, беше организирана од Невладината „ Фор Селект“. Нивната следна дестинација е селото Шишево и Глумово. На денешниот настан, кој се одржа по повод Светскиот ден на рециклирање, и официјално беше промовирана иницијативата TrashTag, додека пак децата испратија пораки за спасување на планетата Земја. Целта е и граѓаните да станат дел од акциите за чистење и да ја одржуваат животната средина што е можно почиста. Од организацијата „Фор Селект“ велат дека во Македонија се рециклира само 1% од отпадот.
РЕПОРТЕРКА: АЛМЕДИНА ИСМАЈЛИ
