При заедничка акција на ЈП „Македонски шуми“, Шумската полиција, Граничната полиција и СВР Куманово одземени се огревни дрва, а приведени се неколку косовски државјани.
Исто така, запленето е комбе со фалсификувана документација.
Веста на социјалните мрежи ја објави Кире Михаилов, заменик-директор на ЈП „Македонски шуми“, кој вели дека поднесени се пријави против повеќе познати и непознати сторители.
„Во поголема акција која се одвиваше изминативе неколку дена во кумановско липковскиот регион, одземавме огревно дрво од повеќе локации, приведени се неколку косовски државјани, одземено е едно ТМВ комбе и поднесени се пријави против повеќе познати и непознати сторители!
Во текот на изминативе неколку дена, во добро координирана акција во која покрај ЈП “Македонски Шуми” учествуваа Шумската Полиција од Куманово, Граничната Полиција РЦ Север и СВР Куманово беше сузбиена поголема добро организирана група дрвокрадци кои подолг период оперираа во кумановско липковскиот регион во близина на границата со Косово!
Одземена е поголема количина на различни дрвни сортименти, но пред се огревно дрво од Злокуќани, Руница, Матејче и од место викано Буково во близина на Белановце, на границата со Косово.
Во Матејче, покрај дрвата, одземено е и ТМВ комбе кое било со фалсификат документација.
На лице место во Буково се приведени и тројца косовски државјани кои биле дел од организираната група и истите веднаш се извадени пред судија на истражна постапка за да бидат осудени.
Материјалната штета која е причинета при сечење на дрвата кои беа конфискувани во овие неколку дена е повеќе од 300.000 денари, а оваа група во изминатиов период има причинето милионска штета.
Во текот на наредните денови ќе биде спроведена и истрага во однос на тоа дали дел од нашата шумочуварска служба била во тесна врска со оваа организирана група“, напиша тој.