Од кабинетот на министерот за надворешни работи Никола Димитров, за ТВ21 велат дека на зградата на министерството не е поставена нова табла, туку само се отстранети дел од буквите.
Како што велат од таму, според Договорот од Преспа, кој стапи на сила по уставните промени и со оглед на тоа дека според уставот, новото име на државата е Република Северна Македонија, буквите со кои беше испишано Република Македонија на македонски и англиски се отстранети. Тоа е направено согласно договорот.
Нова табла не е поставена, бидејќи се уште трае тендерската постапка која оди преку владината служба за општи и заеднички работи. Кога ќе бидат поставени новите табли, со новото име на државата, тогаш ќе бидат поставени на македонски, албански и англиски јазик.
Инаку, тендерската постапка за избор на компанија која ќе ги изготвува таблите завршува на 2 април.