По две или три рочишта за случајот Монструм, вратите на судот ќе бидат отворени и рочиштата ќе бидат јавни, велат адвокатите Насер Рауфи и Дафинка Ивановска. Рауфи е оптимист дека вистината ќе излезе на виделина. Додава дека од СЈО до него и до неговиот колега, Асмир Алиспахиќ не пристигнал никаков нов доказ за „Монструм“.
-Сигурен сум дека ќе ги откриеме сторителите на ова кривично дело. Меѓутоа, од СЈО ниту ни доставиле ниту се вклучени доказите во судскиот предмет. По контролата која ја вршиме сега, немаме забележано дека се доставени. Но, поради чувствителноста на доказите, ние како одбрана ќе имаме можност да ги преслушаме истите. За нас, важно е да стигнеме до вистината – вели Насер Рауфи.
Според него, добро е што СЈО ќе стане дел од редовното обвинителство и ќе се даде можност за целосно расчистување на случајот. Од друга страна, адвокатката на роднините на жртвите, Дафинка Ивановска, рече дека во моментов се слушаат прислушуваните разговори.
Денешното рочиште се одржа зад затворени врати и беа пуштани прислушуваните разговори кои се однесуваат на случајот. Обвинети во случајот се Алил Демири, браќата Африм и Агим Исмаиловиќ, Фејзи Хазири, Хаки Хазири и Сами Љута.
РЕПОРТЕР: МЕВЉУДИН ИМЕРИ